من روائع إبن عبار
هذه قصيده تتكون من 221 لإبن عبار بيت وذكر يها جميع اسماء الله الحسني , وفيها من الحكم الشي الجميل لان
شاعرنا له نفس طويل واضمن لكم انكم لن تملون تطويلها لجزالته .
أول مـا قـلـت وبـديـــت *** بســم الـله ربـي سميـت *** الـلي له صمت وصليت
1- مالـك الملـك الرحمـن
هــو الـرءوف الـرحـيـم *** وهـو الحـكـم والحـكيــم *** وهـو الـواسع والعـليــم
2- يعلـم ما يخـفى وما بـان
الــمـلــك رب الأنـــــام *** هــو الـقـدوس الـســــــلام *** ذو الجـلال وذو الإكــرام
3- سبحـان البـاري سبحان
مؤمـن مهيمـن بالكـون *** مـتعـال وعـدل القـانــون *** الوالـي مخرج ذا النـــون
4- من مظلم جوف الحيتان
هــو العـزيـز الجــبــار *** وهـو النـافـع وهـو الضــار *** وهـو الـقهـار الـغــفــار
5- نطلـب عـفـوه والغـفـران
هــو الـعـلـي الـكبــيــر *** وهــو اللـطـيـف الخـبـيــر *** وهـو السميع البـصـيـــر
6- وهو منزل وحي القرآن
هـو الـعــفــو الـتـــّواب *** وهـو الـرزاق الـوهــــاب *** غـني ومغـني بـالأسبـاب
7- هو ضامن رزق الإنسان
ظـاهــر وبـاطـن بـديـــع *** بـاسـط الـبــر الــوسـيــع *** رافــع ســمـاه الــرفــيـع
8- مسموك ولا لـه عمـدان
هـو الصمـد رب البـيــت *** وهـو الحـفيـظ المـقيــت *** وهـو المحيـي والمميــت
9- يـدوم ومخلوقـه فـان
خـالـق الـخـلـق ومــولاه *** واحــد لا يـعــبـد ســــواه *** الـولـي عـظـيـم الـجـــاه
10- المتكبـر عالـي الشـان
هـو الـشهـيـد الـرشـيــد *** وهـو الـحـمـيـد الـمجـيــد *** وهـو الـمبـدي والمعيــد
11- وهـو الـوارث والديـان
هـو الـغــفـور الـشـكـور *** وهـو الحـق وهـو الـنـــور *** وهـو المقتدر الصبـور
12- قـادر واللي أيريده كـان
هـو الـواجـد والحسيــب *** وهـو الـمـاجـد والـرقـيــب *** وهـو المانع والمجيـب
13- وهـو المعطـي والمنـان
هـو الـمـتـيـن الجـليــل *** وهـو الـقـابـض والـوكـيـــل *** وهـو الـهـادي للسبيـل
14- وهو المقسط بالميـزان
هـو الـقــوي الـعـظـيــم *** وهـو الـمـنـتـقـم الـحـلـيــم *** وهـو الـفـتـاح الـكـريــم
15- ينفـق ما صـك البيبـان
هـو الأول في الوجـــود *** وهــو الآخـر والـمعـبــود *** وهـو البـاعـث والـودود
16- منجي نوح من الطوفان
هــو الـمـعـــز الـمــذل *** وهـو مـقــدم قـــدره جـــل *** وهـو مـؤخـر رب الكــل
17- وهو معطي الملك سليمان
هـو الـحـي وهـو قـيـوم *** وهـو الـبـاقـي دائـــم دوم *** حـاشـى مـا يأتيـه النـوم
18- وحاشى يـأخـذه النسيان
هــو الـبـر بـيـده الخيـر *** جـامـع وخـافــض قـديــر *** مصـور خـلـقـه تصـويـر
19- محصي المخلوق بحسبان
أحــد ولا غــيـــره رب *** مـن خـالـف تـعلـيـمـه تــب *** بـيـديـه الحكمـة والطـب
20- وهـو مبـري سقـم الأبـدان
جـل وتقـدست أسمــاه *** مـالــه مـثـيـل ولا أشــبــاه *** خــلاق الـكــون ومــولاه
21- رب الأنس ورب الجان
خـلـق آدم مـن فـخـار *** والجـن أوجـدهـم مـن نــار *** وخـلـق ما طـار وما سار
22- أشكال عباده وألـوان
خالق الخلق ومنشيـه *** بـديـع الـكــون وبـاريــــه *** ربــي مـا خــيّـب راجـيــه
23- للخيـر أيـدل الحيـران
سبحانه ماله وصيــف *** هـو المعـبـود ولا شـيـــف *** يـلطـف بـالعبـد الضعيـف
24- نطلـب عطفـه والحنـان
هــو الـمتـنـزه بـالـذات *** كـامـل فـي كـل الصفـــات *** هــو فـطــار السـمــاوات
25- والأرض أودعهـا قيعـان
مـن نـادا باسـمـه لـبّـاه *** يسـمع صـوت اللـي نــاداه *** نـرجـو فـضائـل حسنـاه
26- ونشكر فضله والإحسان
كـل عبـاده لـه يرجـون *** وكلن يطلـب منـه العــــون *** ومن يعصى ربه ملعون
27- يستاهـل طـرد وحرمـان
يا للـه يـا مديـر الأفـلاك *** يــا مـالــك كـل الأمــــلاك *** يـا رازق عـمي الأسماك
28- فـي لـج بحـور وخلجـان
يـا منشي مـردوم الغيـم *** يـهـل السحـب مـن الديـــم *** يـنـزل بـالـقـاع الهشيـم
29- وتصير فياض وريضان
يا مرسل زعوج الهـوج *** ينشر سحـاب من المــوج *** يـنبـت خـمائـل ومـروج
30- وأزهار الورد وريحان
يـا ملقـح ريـح الذعـذاع *** مـن غيث البـرق اللمـــاع *** تروي به عطشان القاع
31- سهـل وجبـال وشعبـان
يـا مـن نسيـم الهبـوب *** تديـره من صـوب لصـــوب *** والمزن بقطره مسكوب
32- من سيله يملأ الغـدران
يا فـالـق حـب الحصيـد *** يـا مخضر صحصـح البـيــد *** يا معيد الجـذع الهميـد
33- يا مورق جرد الأغصان
يا رافـع سبـع الأطبـاق *** أعـتقـنـا مـن النـار إعـتـــاق *** لك نبتهل من الأعماق
34- من قلبٍ مخلص ولسان
يا الله يا مهـدي من تـاه *** نـطـلـب خـطـانـا تـمـحــــاه *** يـا رب العـرش النجـاه
35- من صالي حـر النيران
يـا للـه يـا رب الـثبـات *** نـطـلـبـك اصـلاح الـنـيــات *** ايقضنـا عقـب الغـفلات
36- وأشف اللي قلبه مرضان
أرشـدنـا لـدرب اليـقيـن *** ولا تجعـلنـا مـن الـغـاويـــــن *** أصلح دنيانـا والديـن
37- وارزقنـا بجنة رضـوان
يـا اللـه يا خـلاق الناس *** بــك نـعـوذ مـن الـوســـواس *** تكـفـينا شـر الخناس
38- ومن سؤ وكيد الشيطان
أطلب عفـوك يا مـولاي *** ولا أبـث لغـيـرك شـكـــواي *** لا تشقيني فـي دنـيـاي
39- وأشرح صدري للأيمان
يـا رب لعفـوك مشتـاق *** لا تـجـعـلنـا مـن الـفسّـــاق *** أهـد اللـي قـلبه ما فـاق
40- داله في نومه غرقـان
يـا لله فـي حسن الختـام *** راحـت لـيـالـي وايـــــــــام *** كـنـهـا طـيـف الـمـنـــام
41- تشبـه خـيـال الحلمـان
يا للـه نـطلبـك الصلاح *** ما عـقـب الشـيـب إلــى لاح *** ما ظـن يعود اللي راح
42- من شبوا صاروا شمطان
بانـت وضـح المغـاتيـر *** والشـيـب يـسـمـى نـذيــــــر *** واللي بـه شيبٍ غزيـر
43- يحسب من ضمن الشيبان
شيب العوارض والروس *** ما نفع به حلق المــوس *** ما فاده صبغ الطاووس
44- في قوعه مثل الصيبان
الذقـن أن كان أنه شـاب *** لو تصبغ صبغك ما ثــاب *** مـا فـاده كـتم وخـضـاب
45- بياضه يلمع لمعان
أسمـع كـلامي مـن جـد *** مـن نــزل بــالـدنـيا شــــد *** عمرك يا بن آدم لـه حـد
46- يوقف في ميد الميدان
عمـرك يا بن آدم قصيـر *** أحـذر لا تـنسى الـمصـيـــر *** ما يوجد للعمـر سبيـر
47- ينتهي ولا له ضمـان
عمرك يا بن آدم قصيف *** أحـذر من كثـر التسـويـف *** له موعد ما به تطويف
48- ولا يؤخـر يوم إلى حان
عمرك يا بن آدم محدود *** لا تنسى اليوم الموعـــود *** بين البيض وبين السود
49- لازم قولت مات فـلان
عمـرك يا بـن آدم قليـل *** جـهـز نـفسـك لـلـّرحـيـــــل *** لـو طال العمـر الطويـل
50- لابـد يطـويه الزمـان
عمرك يا بن آدم يفـوت *** مـن عمّـر قـافـيـه المــــوت *** فـي نعش ولا بـتابـوت
51- صيورك ترحـل عريان
عمرك يا بن آدم محسوب *** ونفسـك لا تحملها ذنـــوب *** لازم عن ذنبك تتـوب
52- قبـل تدفـن بالكثبان
سـيـف الـمـنـايـا فـتـّاك *** ومصـيـر العـبـد الـهـــلاك *** مـهـمـا تعـيش بـدنـيـاك
53- في جوف الأرض المسكان
أطلـب عسى اللـه يهديـك *** وحـذراك الدنيـا تغـريـــك *** ولا تنسى يـومٍ يـأتـيـك
54- تدرج في بيض الأكـفـان
مـن عمّـر بـالدنيـا مـات *** بـــادت حـكـّام وســـــادات *** وزالـت قـيّاد وبـاشات
55- وأفنت أمـّار وشيخان
يـا مـا زالـت مـن حكـّام *** لـهــم هــيـبـة واحـتــــــرام *** عـقـب الدولـة والنظام
56- ويـن السلطـة والسلطان
ما خلـّت شيـخ ولا أميـر *** ولا منـصــوب ولا مــديـــر *** حتى الرّيس والوزيـر
57- والحاجـب والترجمـان
كـم مـن جـبـار وعـنـيـد *** شـجـاع وبـأســه شـديـــــد *** أصبـح بالبـرزح وحيـد
58- جسمه يرعاه الديـدان
صـيـور الـدنـيـا الـزوال *** يـا مـا زالـت مـن أجــيـــــال *** شالـت مغاويـر أبطال
59- واقفت بقـروم الشجعان
خــذ العـبـرة بـالفـانيـن *** مـن حـكـام وسـلاطـيـــــن *** وين أسكندر ذو القرنين
60- وين النمـرود وكنعـان
ويـن الخـليـفـة هـارون *** ويـن الـمـتجـبـر فـرعـــون *** ويـن الـمتكـبـر قـارون
61- ويـن المتبجـح هامـان
الماضـي يعطينـا أخبـار *** عن وضع الدنيا وما صــار *** أنظـر وتشـوف الآثـار
62- بديار الحجر ونجران
والحاضر يعطينا درس *** عن واقع دنيانا الشــرس *** وش حصل بديار الفرس
63- وش صار بديرة لبنان
مـن هـرّفـت لـه دنـيـاه *** لابــد مـن يــٍوم تـجــفــــاه *** أنظر وش سّوت بالشاه
64- ما كنه حاكم بايـران
الـدنـيـا عـبـر وأمـثــال *** تـقّـلـب مـن حــال لحــــال *** خلت بعض الـدور أطلال
65- وهـدّمت صرح البنيـان
دولاب الــدنــيــا يـــدور *** لـو تـقـبـل تـعـطـي دبــــور *** هـدت عـمائـر وقصور
66- وخرّبت مدن وبلـدان
نـعـيـم الـدنـيـا مـــا دام *** كــنــه أضـغـــاث الأحــــلام *** تـجـعـل العـامـر حـطـام
67- وتبـلا شـماخ العمـران
نـعـيـم الـدنيـا تـزيـيـف *** تـكّـدر مـن عـقـب الكـيــــف *** مثـل الهبايـب بالصيف
68- ولا الربيع بنيسـان
نـعـيـم الـدنـيـا جـــذاب *** وعــمـار الـدنــيـا خــــــراب *** تشبـه ضحـاح السراب
69- ما يروي كبـد العطشان
زوائـد دنـيـانـا نـقـص *** من تمكـر به رزقـه بقـــص *** ما بين الحزن والرقص
70- تبهج صدر البهلـوان
ما عن واقعهـا مناص *** ولا هي هقاوي وأخــراص *** حاسب ضميرك بخلاص
71- يا للي بالدنيا شقيان
الحقائـق مثـل الشمس *** تـبـيــن ولا تـقـبـل طمـــس *** أركـان الإسـلام الخمس
72- فرضها الله خمس أركان
واجـب دينـك لا تنسـاه *** ولا تـهــاون بـالــصــــــلاة *** والـشـهــادة والــزكـــاة
73- والحج وصوم رمضان
أد الـواجـب بـالـتمـــام *** ولا تـقـرب مـذهـب هـــــدّام *** شـرفـك اللـه بـالإسـلام
74- دينك هو خير الأديـان
أجتهـد وربــّك يـأجـرك *** وأحذر من شك ومن شــرك *** أخلـص للـه سـرايرك
75- وأتـقـه قـدر الإمكـان
أجهد في كسب الثـواب *** وأبــذل لـلخـيــر الأسـبـــــاب *** ربـك غفـور وتـواب
76- لا تمـادى بالعصيـان
تـب للمولى عن خطـاك *** وأحــذر تـغـــرك دنــيـــــاك *** وأحـذر لا تـتبع هـواك
77- وأبعـد عن كفر وطغيان
أحـذر نفسـك لا ترميـك *** عـلـى الـضـلال تــوديــــــــك *** حاذور الغاوي يغويك
78- من طاوع غاوي غويان
أسـتـثـمـر كـل الأوقـات *** والـدقـائـق والـسـاعـــــــات *** موسم عملك إلى فـات
79- تعض إبهامك ندمـان
عـصـر بـه قـل التوجيـه *** الـلـه يـسـتـر مـن تـاليـــه *** فـيه الواقع لـو نطـريـه
80- صار البرذون كحيلان
المستغرب ينشد ليـش *** كيـف السحلي صار حنيـــش *** والعريب اليوم كديش
81- والبغل سموه حصان
واليـوم أشـوف الهليب *** بـالـسـبـق خـلا الـعــريـــب *** لا عبرة لو شفت الذيب
82- يجفل من شوف الطليان
مهمـا بالواقع نخـوض *** قـول الصراحـة مرفـــوض *** الأرنب سادت بالروض
83- والصيرم مالـه جنحان
واللي من مصقر غيمـار *** مـا يـقـنص فـيه الصقـــار *** حـول من فوق الأوكار
84- وخلا الماكر للسمقان
الـلـّقـلـق بـالماكـر فـاز *** وصعـد مـن فـوق المركـــاز *** السمونـة صـارت بـاز
85- والرخم صارت عقبان
الفاهم يدري بالحيـث *** عن وضع العصر الحديـــث *** تساوى الثعلـب والليـث
86- والوبر هو والسرحان
أشوف النمر الفروس *** يشكي من عصره منكــوس *** الكرعان أودعها روس
87- والروس أودعها كرعان
دواعـي خـراب الجيـل *** عـصـر الـموضـة والمـديـــل *** وأهل الكورة والتمثيل
88- يدعون نجوم وفرسان
شـبـاب الأمـة يـضيـع *** مـا هـمـه غــيـر الـتـشـجـيـــع *** يسـمع تعليـق المذيـع
89- ويرقص وسط المهرجان
وأن كانه فـاز الـفريـق *** يـدمـي كـفـه بـالـتصفـيــــق *** لـه صفيــر ولـه شهيق
90- يمرح بالبيداء فسقـان
تـّخـرب طبـع الشبـاب *** يـمـشـون بـسلـم الاجـنـــاب *** لولا الخوف من العقاب
91- سارو بالشارع ملطان
الـفـتـى قـلـبـه مشطون *** سـلـمـه وتـراثـه يـهــــــون *** راح أيقلد مستر جـون
92- ويرطن رطين مريكان
عـز الإسلام المشموخ *** مـا هـو في لستــك منفـــوخ *** بـالـدبـابـة والصـاروخ
93- وقهـر الطاغي بالأكوان
تغـيّـر بـالناس السلـم *** وكـثـر الـمعـاصي والـظـلــم *** نـزل تـقـديـر أهـل العـلم
94- وعز اللاعـب والفنان
وضع المسلم مالـه حل *** قـالـوا مـبـطـي عصــره زل *** الـعـالــم والـعـابـد ذل
95- مضهود بكل الأوطان
شنوا ضد المسلم حرب *** بالشـرق وبديار الغــــرب *** والشاهد مفعول الصرب
96- والشوعي بفغانستان
الوضـع الحالي خطيـر *** السـيخ أفـتـن فـي كشمـيــر *** وعم الصومال التنصير
97- وجنوب بلاد السودان
الـمـلـحـد شــره يــزداد *** عـمـل بـالـشـرق أسـتـبــــداد *** الكافـر يحـتـاج جهـاد
98- بالهرسك أو بالشيشان
يا عرب يا عيب العيــب *** تـحـتـار أفـكـار الـلبـيّــب *** كيف الداعـي والخطيــب
99- يمنع عن رد الرهبان
الأمـة تحتـاج إسعــاف *** واقـعـهـا بـالـعـيـن أيـشـاف *** قـبـل يـصيـر انـحــراف
100- ونسير بركب العدوان
طالع من حولك وتشوف *** ظلم وجور وذل وخـوف *** حرب وكوارث وحتـوف
101- قحط وزلزال وبركان
أنظر شرق وشف شمـال *** تسمع مصائـب وأهــوال *** من سبب خبث الأعمـال
102- العمل بالعالم شـان
أنظـر وأتشـوف الكفـّـار *** مـن طـواغـيـت وفـجــار *** وشـف اللي لدينه يغـــار
103- صا به نكبة وامتحان
كـثـر بـالنـاس الـفـجـور *** والـنـكـد وأعــمال الـجـــور *** والـتـّـكبــر والـغــرور
104- والقرابـة حقـّه هـان
كـثـر بـالـنـاس الـفـسـاد *** والـضـغـائـن والأحـقــاد *** ساروا مع مبدأ الإلحـــاد
105- وكادت تعود الأوثان
كـثـروا بـالناس الطاغيـن *** يـمـشـون بمنهـج ليـنيـن *** بالواقع ما هـم داريـــن
106- وعن الحقائق طرشان
كـثـر بـالـنـاس الـشـذوذ *** والـعــاقـل مـالـه نــفــوذ *** صـار السافـل والمنبــوذ
107- يقدح زنده بالصـوان
كـثـر بـالنـاس الجحـود *** والـقـطـيـعـة والــصــــــدود *** هــذاك لـهــذا حـســود
108- أحسد من سود الغربان
كثـر بالناس العـقـوق *** مـا تـقـــل بـيـنـهــم حـقــوق *** كـلــن يــصــد ويــمـوق
109- ولا يشفق عقب الهجران
كثروا بالناس الأشرار *** وكـثـروا عــمـيـان الأبـصــار *** أدناهم يعطيك أفـكــار
110- أيتفلسف كنه فهمان
الشيمة بيعت بفلـوس *** وضاع من الناس النـامـوس *** وأرتـفـع قــدر البلـوس
111- وأعتز الهايف بوقان
ضاع السمت وضاع الكار *** وكلـن يمشي بـاستهتـار *** راحـوا وافيـن الأشبـار
112- والجيل التالي خربان
صار الماضي مثل الحلم *** ويــن العــادة ويــن السلـم *** طاحـوا في تـقليد الفلم
113- وحادوا عن طبع الجدان
تـيـار الـعـصـر الجـديـد *** كــلـن يـمـشـي بـالـتـقـلـيـد *** تـلاشى الـسلـم الحـميـد
114- وراحت عادات العربان
حـصـل بالدنيـا تـغـيـيـر *** دمــر واقــعــنـا تـــدمــيـر *** أهــفـا الذمـة والضميــر
115- والسالم قلبه وجعان
صـاب المجتمع اهتـزاز *** والـمـنـكـر وسـط الـتـلفــاز *** كلـن ركـب دش جهـاز
116- جاب أمريكا واليابان
راحـت عـادات الأجـداد *** وأخـتـلـف سـلــم الأجــواد *** كـلن شبعـان مـن الــزاد
117- مخبـاه وبطنـه مليان
كـلـن تـغـيّــر مـبـــداه *** والـسـلـم الـمـاضـي خــــّلاه *** مـرامـه يــمـلأ مخــبــاه
118- ويرصد بالبنك الميلان
وين سلوم أهل العادات *** ويـن الـنخـوة والشـومات *** راحت ما ترجع هيهــات
119- مع دور حقوق الجيران
وين الحشمة والوقـار *** راحـت مـع عـصـر الأبـرار *** الجـار أهـفا حـق الجـار
120- وكلن من جاره زهقان
كـلـن قـصيـره يشناه *** يـشـكـي مـن قــربـــه مـــا ذاه *** يـقـول أبنـه مـا ينهــاه
121- ولا يمنع شر الورعان
كلـن يـقـول القصيـر *** مـا يــلــقـى جـــاره تـقـديـــــر *** قصرتـه شـر وشـريــر
122- أقشر وعياله قشران
واللي جاره خايب سد *** إلـى شافــه عـن وجـهـه صـد*** يا كبر الفرحة لـو شــد
123- ينذر لفراقه خرفان
وأبي أنصحك من الصميم *** أبـعـد عـن قـرب الـلـئيــم *** تـرى لـو قدرك حشيـم
124- لازم يوريك الحقران
مـن عافـك جـازه بالتـرك *** لــو قــدرتــه مــا قــدرك *** مـا حشـمـك ولا وقــرك
125- من صاحب خائب ينهان
عـليـك بـقـرب المأمـون *** كـريـم أخـلاق ومضمـون *** صـدوق وطيبه مبخـون
126- لـو شاف الغرة ما خان
خـل الطيّب لـك رفيـق *** تـلقاه بـساعـات الضـيـق *** يظهـر لـك صدق الصديـق
127- حزت تحتاج الصدقان
خـاو رجالاً ملتزميـن *** علـى الـطـاعـة مـتصـافيـن *** لـو ما هـم عصبـه دانيـن
128- صاروا بالإسلام أخوان
وإلى صاحبت الأخيـار *** تـسـمـع مـواعـظ وأذكـــــار *** حديـث وحكـم وأشعــار
129- تجلي همك والأحـزان
تأخذ بالقول الموثوق *** مـنـقــول بـقــول الــصـدوق *** أبــو بـكــر والـفـــاروق
130- والطاهـر علي وعثمان
تأخـذ بالقول المسنود *** عـن مسلـم وابـن مسعــود *** هـذا الكسب وهـذا الفـود
131- ما هو فوائد عوجـان
عـن مجلسهم غاب إبليس *** ما معهم نـذل ولا هيـس *** ما يشقـا فيهــم جليـس
132- رافقهم وأنت الربحان
وأبعد عـن صحب الأنـذال *** مجلسهم مـا سـر البـال *** تسمع طـاري قـيل وقـال
133- ومن جاهم يقفي زعلان
بعـض المجـالس شّـلات *** صـجـة وأغـلاط والـجـات *** لـو نادوا لك بالأصوات
134- أبعـد تـراهم قـومان
أبعـد عن شيطان الأنس *** ما هو موثوق ولا ونـس *** تـّقـلب مـن جنس لجنس
135- ومن زود النعمة بطران
الـفاسد مـالـه وصـيـف *** يـنكـر ويصنـف تـصنيـف *** مـا فـادك لـو داره ريــف
136- من رافق فاسد خسران
أحذر من خطو المثبـور *** أجعـل لك من دونه ســور *** ترى الخائب مثل الثـور
137- مقامـه جـر الفـدان
وأحذر من خطو البلاف *** مـا نـفـل يـوم ولا نـــاف *** لو صعد روس الأشعــاف
138- لابـد ينزل للطمـان
وأحذر من خطو الخبيث *** فـكـره مـتـلـوث تلـويـــث *** مـثـل المكـلـوب الغـليـث
139- يهرف هريف الضرمان
وأحذر من خطو الملسون *** سكين لسانه مسنــون *** حـكيـه هـقـاوي وظنــون
140- يحسب من ضمن الكذبان
وأحذر من خطو الخـراط *** هـرجـه معـانـد وغــلاط *** كـان أنـك عـذلـته شـــاط
141- مثل العزوم بلا عنان
وأحذر من خطو المطفوق *** مـا عـنـده شـم ولا ذوق *** ما حكّـم لفـظ المنطـوق
142- يلوخ بوسط الديوان
وأحـذر من خطو الـملاق *** صاحب تمريــخ ونـفـاق *** الأحمـق مـا معـه أخلاق
143- يزوم سوات الطنيان
وأحـذر من خطـو المكّار *** دائـم بـالـصاحـب غـــّـدار *** مثـل السحّـار الـقـمـــار
144- كاهن وأصحابه كهّـان
وأحذر من خطو الخداع *** دائـم بـالـصـاحـب طـمــاع *** يكيـل ويبخس بالصــاع
145- ويبيع بغالي الأثمان
وأحذر من خطو المذموم *** يـفـرح بـالـعـايـز والـلـوم *** خـنجـر لـهاتـه مسموم
146- وفي عرض الغائب طعّـان
وأحـذر من خطو النمّـام *** مـغـــرم فـي نـقـل الـكـلام *** مقـصـده قـطع الأرحــام
147- وتفريق قلوب الخلان
وأحذر من خطو اللجلاج *** الـلـي بـالـغــائـب هــّـراج *** مـثـل الـصـراة الهـماج
148- تاليها وحـل وسيان
وأحذر من خطو الهبيـل *** بـالـك تـحـطــه عــمـيـل *** ترى الجاهـل حاطـب ليـل
149- مخطر من لدغ الديبان
وأحذر من خطو الهـذار *** وسـط الـمجـالـس ثـرثــار *** لـه ملسن مثـل المنشار
150- يقول وهرجه هذيان
وأحذر من خطو الغشاش *** لا يــغــرك حـيـثـه لاش *** مـا هــو للجـزلة حـّواش
151- ودك ترداه بمهوان
وأحذر من خطو السفيه *** جـنـب دربـه لا تـمـاشيـه *** لا تــباريـه ولا تخـاويــه
152- بذيء لسان ولعان
وأحذر من خطو الشمّات *** دائـم يــدور الـهــزعـات *** ولـو تعـمـل بـه جـمالات
153- يعلن جحود ونكران
وأحذر من خطو الغثيث *** لا جـابـه من جـاب الغيـث *** ردي الشيـمـة والـديــث
154- أجعل من دونه فرقان
وأحذر من خطو السكار *** ما يـدري من حكي العـار *** يـبحث عن منتوج البـار
155- كل يوم تشوفه سكران
وأحذر من خطو الرزيـل *** ما عـمـره سـوى جـميــل *** حـفـاظ الـمـال الـبخـيــل
156- من ضافه يقفي جيعان
وأحذر من خطو المنبوز ***مـا ينـفـع في وقــت العــوز *** خـلـه يـذلـف للهامـوز
157- هريد وقربه نقصان
وأبي أملي للعـاقـل درس *** ملحوظـة تكتـب بالطـرس *** أحفـظ بـذارك بالغرس
158- وأستثمر طلع البستان
خذ حذرك وقت الــّزواج *** لا تـأخــذ بـنـت الـهـلبـاج *** لو يحـمل في متنـه تـاج
159- ما فاده حمل التيجان
ولا تأخذ بنت المدنوس *** خـلفـة زلايـب وهـدوس *** تلقى عروقـه فيهـا سوس
160- والغصن الناعم خرثان
ولا تأخـذ بنـت الديـوث *** بالـدنس عـرضـه مـليــوث *** عـسـاه بـنـاب مـغـلـوث
161- ولا في شوكة ثعبان
ولا تأخـذ بنت المنكود *** متغـاضـي وأعـمـالـه ســود *** عـسى يــرداه العـبـرود
162- من عباريـد الفلكان
ولا تأخـذ بنت القطوع *** يـأتـي ولـــدهـا مـسـبـوع *** ما هـو لأمـر الوالـد طـوع
163- حيثه معامق رديان
ولا تأخذ من عرق العوب *** قـويـت رأس ونـصـوب *** لازم تـلقـى بـك عـذروب
164- وتترك بحالك ذهبان
إلى صارت عوبا وعديم *** مثـــل الشيطـان الـرجـيـم *** عـفـهـا مـن بـد الحريــم
165- لو ما من غيره نسوان
تـرى خـطـات الـمــــدام *** تـطـيـعـك مـا دمـت غــلام *** والـشـايـب مالــه مـقـام
166- لا كبر قالـت خرفـان
وأحـذر شينـت الضميـر *** تـذهــب مـالـك بـالـتبـذيـر *** تــتـرك ورعانـك دشيــر
167- يسعون سوات اليتمان
وأحـذر دنـست الشـلـيـل *** مـا يـثـق فـيـهــا الحـلـيـل *** عـرضهـا مثـل المنديـل
168- لا تـغـرك بالفستـان
لا تغـريـك بكثـر الـزيـن *** بـيـض الخـد ووسع العيـن *** ما فـاد الشكـل الحسين
169- لـو شفت المظهر فتـّان
قشـرا المخبـر لا توهمك *** مـا تـقـّدرك ولا تحشّـمـك *** ما تـوافـقـك ولا تلائمـك
170- لو تشبه ريم الغزلان
وأسـمع قـولـي بـانتبـاه *** الـعـاقــل يـصـلـح ضـنـــاه *** كـلـن عـنـد الـلـه جــزاه
171- ومن يمشي بالحق معان
أنصحـك تراقـب ولـدك *** شــانـــه يــهــمــك وحـدك *** أن صلـح يكـبـر سعــدك
172- وأن خاب لحقك ما صان
من تيّـه منهاج الدرب *** ماعرف الجمع من الضّرب *** واللي خالط عيط الجرب
173- لازم يطلا بالقطـران
خـلـّك فـطين وحسّـاس *** عـلـّـم نـجـلـك لـلـنـومـاس *** قـبـل تـبـني قــو الساس
174- وجود صبات السيسان
راقـبـه وخلـك حريـص *** لا تـجـلــب عــزك رخـيـص *** عـلـّـم طيـرك للقـنيـص
175- وأحذر طير ابن برمان
الـولــد وده تــدريـــب *** حـتـى ايـتـعـــود لـلـطّـيـب *** أبعــده عـن طـرق العيـب
176- كي لا يا قع بالهوان
الـولـد وده تـعـلـيــــم *** حـتـى يـمـشـي مـستــقـيــم *** والـلـي مـا عـقـلـه سليــم
177- قـلبه وعيونه عميان
الـولـد تـركـه مـا جـاز *** سـاعــده ويــأخــذ مـمــتــاز *** وكـانـه بالـدراسة فــاز
178- نال العـز وحظـه زان
الـولـد زيّــن مــربـــاه *** سـنـعـــه وعـــّدل عــوجـاه *** راقـبـه وأعــرف ممشاه
179- كان أنت لخيره شرهان
الـولـد مـا هـو بـسيـط *** شـجـعـــه وخــلــه نـشــيــــط *** لا تــدزه مـثـل مـقـيـط
180- وترميه بوسط القلبان
الـولـد وده مـجـهــود *** حيثـك عـن فـعـلـه مـنشـود *** أرشـد قبـل يـقسي العـود
181- ما دامه عوده ليـان
ولـدك الـله به وكـلّـك *** كـان أنـت أهـمـلـتـه يـهـمـلـك *** وأن مـا ربـيتـه خجلـك
182- خلاك الخايب خجلان
نصح الوالد له مفعول *** أنـصـح بـالهـرج المعـقـول *** كلـن عـن نجلـه مسئول
183- ترانا مثل الرعيان
أحفـظ نجلك لا يضيع *** وأحسـن لـه فعــل الـصـنيـع *** يظهــر عطـوف ومطيـع
184- ويصير النشمي ديقان
خـلـه للـزينـة يـعـتاد *** ولا أيصاحب خـطـو السرماد *** عـن رفـق الفاسد بحيـاد
185- لا يصاحب بعض السردان
راقب نجلك لا يخيس *** لا ايـصاحـب خـطـو الـخسيس *** أن فـسد حظـه تـعيس
186- جاه الشر من العشران
أحذر من خطو الخدين *** لا يـصـبـح لأبـنـك قـريـــن *** والـلـي رافـق منحرفيـن
187- داس الشيمة بالحذيان
لا تجعـل وقـتـه فـراغ *** يـمشي تفـريـع بـلا شـمـاغ *** من لا يخجـل عـقلـه زاغ
188- أقر الخط من العنوان
كانه رافق هايت هات *** مـن ضمـن شلـل الحــارات *** فتش جيبـه تلـقـاابـكـات
189- تعلّم شرب الدخان
وعقبه يقع بالمشروب *** مـا بـين مخـدر وحبــوب *** ويصبح للسلطـة مطلوب
190- مقره عند السجان
كـلـن يـشنـاه ويشنـاك *** سـيـبـتـه وأحـمـل مـا جــاك *** بإهمـالـك ربــك جـازاك
191- قلبك من فعله حرقان
يا من تجمع سحت القوت *** تـغـيـب وبـيـتك مفلـوت *** ولـدك أغـواه السربـوت
192- وأنت بحاجاتك بلشان
تركض وملهيك الـمـال *** وضيـعـت عـيـالـك بـإهـمال *** واللـي مـا ربـوه رجـال
193- يبشر بالكوبـة كوبان
مـا كسبت ولا حصلـت *** كـان أنــت لـولـدك أهـمـلـت *** خـلـيته بالشـارع فـلـت
194- تمرد وأصبح فلتان
خسـرت وبأعمالك خبـت *** كانــك لأبـنـك مـا أدبـــت *** وإلــى كـبـرت وشّـيـبـت
195- عن خدمتك أصبح كسلان
كانـك لأبـنك مـا ربـيـت *** سـربـتـه ضـمن الـهـيـيـت *** دايـم مـا يجلـس بالبيـت
196- يلوج بظل الحيطان
شفتـه مع خطو الحليف *** يهــرف بـالشـارع هـريــف *** أمـا مـوبــز بالرصيف
197- ولا في بـاب الدكان
من صابه فشل وأحبـاط *** يـأخـذ بـالـحــارات أشـواط *** يـحمـل بخـاخ وخطاط
198- وبس أيشخمط بالجدران
شفتـه مع خطـو النـديـم *** يـمشي بـالـشـارع يـهـيــم *** يســوح ســوات البهيـم
199- رجال وكنه حيوان
كيـف أنـك خـليتـه مــد *** والـلـيـــل امـســـاه ولا رد *** يـسـرح بـاليـوم وبالغـــد
200- ولا تدي وين أبنك كان
كيـف أنـك خلـيته راح *** ولا تـدري ويـن الـمسراح *** هـو يـمشي حـر ومرتـاح
201- وأنت من غيابه تعبان
كيف أنـك خليته سـج *** ولا راقــبــتـــه حــتــى دج *** وأن كبـر عـن قربـك هـج
202- يسهجك وكنك طوقان
وأن مـا راقبته يغـتـر *** ومـع درب الفـاسـق يـنجــر *** وإلـى رافـق عصبـة شر
203- خلاك الخايب نشبان
عـن مسيره ما تنهاه *** ولا تــدري بـالـلـي سّــــواه *** حتى لــو شفـت أخـويــاه
204- شلة فسّاق وزعران
يمشي مع شلة تفحيط *** وأن عــذلــتــه يـستشـيـــط *** مغــرم بأنغــام الشـريـط
205- ومن صوت المطرب طربان
لكـن ما تـراقـب عـليـه *** ولا تـنـشـد نجلـك وش فـيــه *** حــتى خــاواه السفيـه
206- وصار من حساب السفهان
شفته في حال الممهون *** غـويان وفـكـره مشطــون *** ما تقـل بالـرأس عيـون
207- ولا تشوف حيود الضلعان
شفت الخنافس بالرأس *** ولا عندك بالمظهـر بـأس *** لـو شفت شرفـه ينـداس
208- حسبته لعب الصبيان
أسمع منطوقي بالقـاف *** مـالـي مقـاصـد وأهــداف *** أهــدي شعــري للعـراف
209- يفهـم مضمون القيفـان
بـديتـه بسـم الجـبـار *** بـسـمـه نـظــمـت الأشـعـــار *** هــّـداج الـنـبـع الـفـــوار
210- ما يشبه نضح الحسيان
الـحسـو نـبـعـه قـليـل *** مـا يسقـي لـو جـاه السيــل *** نضحـه ما يـملأ الصميـل
211- رس ولا يروي ظمـيان
أفهـم كلامـي يـا صـاح *** مـا قـلـتـه قـصـدي قــداح *** ولا نـــي لـلعــالــم مــداح
212- أرشد من عنـده وجدان
أسمع وأعطيك أرشادات *** وأفهـم مقصود الغايـات *** تـحــل بــصـبــر وسكـات
213- ولا تنسى حكمة لقمـان
قلـت وسجلـت المنظـوم *** قـولـي وضحـتـه مـفهــوم *** ما قـلتـه سـر ومـكتــوم
214- عذروب الحق الكتمان
قـلـتـــه لـلغـافـل تـنبـيـه *** شهـرتـه مـا نـي مخـفيـه *** أدعـيـه بصـوتٍ يـوحـيه
215- وأعلتنه بالقول إعلان
الـقـاف أوضـح مـعـنـاه *** لـلـي يـفـهــمـه ويـقــراه *** قـلــتـه لـلـعــاقــل وصــاه
216- وعندي دليل وبرهـان
قلتـه مـواعـظ وأرشـاد *** مـا هـو سب ولا انـتـقــاد *** تـوصيـف لبعـض الأفـراد
217- منظومة مثل المرجان
نصيحة والشعر شعـور *** نـأخـذ بـالـقـول المأثــور *** أفـهـم ما قـلـت ومشكـور
218- وأسمح كان أني غلطان
قـافـي نـقحـتـه تـنقيـح *** مـا بـه لمـز ولا تجريــح *** واللـي مـا هـرجـه صحيـح
219- أخطأ ما صاب النيشان
قلت ومن شعري نظمت *** والقول أخير من الصمت *** نـصيحة فيـهـا ساهـمـت
220- عسى ما تذهب مجان
وآخـر كـلامـي بـالـقول *** صلى الـلـه على الـرسـول *** شفـيع الخـلـق المرسول
221- محمدصفوة عدنان
سوقي وأعتز شامخ الراس مايهنز أشوف المدينه ويضيع قلبي ويفز
|